【浸浴體驗指南：自家製養生SPA？】

按摩院美容院休業咗咁耐，無論想做facial定放鬆下筋骨都好難。既然無得出去釋放疲勞，不如自己喺屋企浸浴啦！！只要揀啱一套屬於你嘅浸浴方式同時間，浸喺水就養到生絕對不是夢。

 

浸浴的好處

唔知有無人好似小編咁，肩頸經常性痠痛。浸浴唔單止令肌肉不再僵硬，舒緩身體上各種疲勞；水嘅熱度令皮膚血管擴張，從而可以改善血液循環及加速新陳代謝。當排毒排得好，自然可以解決埋水腫問題，攤喺到浸浴就排到毒實在太吸引啦～尤其返office嘅絲打，長期坐到下半身血液循環變到慢晒，唔想對腳變得愈來愈粗，不妨浸浸佢放鬆下。

 

合適的水溫

根據人體體感溫度，最理想舒服嘅水溫應該維持喺攝氏38至40度左右。好多人都話女人沖涼比起男人更加受得熱，大家都可以因應自己嘅喜好調節水溫。當水溫愈高，交感神經都會愈活躍，所以浸落有微微嘅亢奮感都係十分正常，最緊要唔好熱到燙傷自己。

 

合適的方法及時間

浸浴仲可以細分成「半身浴」同「全身浴」。

半身浴即係浸浴嘅水位只去到心口位置，對心臟嘅負擔比較小。主要可以消除下半身嘅水腫問題，就算浸浴時間長少少都唔怕，如果想慢慢歎可以浸30分鐘以上！

全身浴水位去到頸部位置，相對半身浴更全面地發揮到浸浴嘅正面功效，血液循環會更加強烈。不過呢種方法就唔建議浸太耐，最好控制喺30分鐘以下。

 

現時市面上已經有好多唔同款式嘅浴球或者入浴劑，有解除疲勞、排毒美顏等等功效。

只要揀到合適自己嘅浴球，浸浴養生就更加事半功倍啦。

無論選擇邊種方式浸浴，最緊要都係量力而為，唔好過度浸泡。浸浴之後趁體溫仲係暖和，盡早上床休息，第二朝起身皮膚變靚返，人都自然精神爽利啲喇！