以十萬個激嬲女朋友嘅理由嚟講，總有一個理由係關月經事。如果要整本男朋友生存指南，講M COME應該都可以滿咗幾頁紙。各位男友們，你哋可能未必體會到M痛到底點痛法，我絕對明白。見字飲水而家人人都識講，唔想再「自殺式關心」女朋友？建議你試下理解咗M痛係咩一回事先，打破「女友M COME，男友不堪」嘅定劣。

 

其實M痛主要分兩類，一種就好似長期食滯咗咁肚脹脹，感覺好似有一百隻大笨象喺度奔騰緊咁……但實際上又真係未必排到便，結果咪谷住谷住。

另一種再慘啲，腹部痙攣加埋強烈嘅間歇型疼痛，嚴重起嚟仲可以痛埋落背脊。我諗呢種痛最折磨就係好似買一送一咁，痛一個位置唔夠㗎，送多個畀你添。

小編就試過痛到連床都落唔到，所以你叫我飲水，同新年啲親戚拜年講聲「身體健康」差唔多。

 

 

子宮同女人個心一樣，只要有一點點溫暖就會好好多。不過叫飲熱水係唔夠㗎，因為要驅寒呀Ching。親手沖杯紅糖水或者黑糖薑母茶比佢飲，暖宮驅寒一定有效；你嘅細心，佢都會見到，掂晒。

頭先講完內服，梗係要配合埋外敷。以物理效果嚟講，熱敷係舒緩到經痛㗎。所以可以有兩手準備：暖水袋屋企用，暖包/暖貼出街用。加上月經期間大量出血，會比起平時更加體虛怕凍，有佢哋就唔怕凍親女朋友啦。

都係搞唔掂嘅話，袋埋經痛止痛藥喺身啦，食藥一定係最快止到痛嘅方法。如果真係好擔心，陪埋佢去搵醫生查詢啦。你可能又心諗，我又唔係醫生，你同我講做咩，同佢講啊嘛.jpg  

講咗咁耐，其實大家要明白女人M痛固然需要實際嘅解決方法，但女人最想要嘅係男朋友嘅關心，即係愛呀。無論做幾多嘢都好，其實都係靠男友嘅關懷同愛護，呢一切先會有意義。記得除咗用把口講之外，愛係要做出嚟㗎。